BAKI, AzerVoice, Səməd Əyyubov – İran Xarici İşlər Nazirliyinin sözçüsü İsmayıl Bəqai ABŞ-la İran arasında nüvə proqramı üzrə danışıqların yer və vaxtı barədə razılığın əldə edildiyi barədə yayılan məlumatları təkzib edib.
AzerVoice xəbər verir ki, bu barədə o “Goftogoo” radiosuna verdiyi açıqlamada bildirib.
“Son üç-dörd həftə ərzində bu mövzu ilə bağlı bir neçə dəfə yalan və uydurma xəbərlər yayılıb. Onların yalan olduğu da sonradan sübut edilib. Bu xəbərlərin bir qismi açıq şəkildə təxribat xarakteri daşıyır” - deyə, Bəqai qeyd edib.
O, ABŞ və İran arasında dolayı mesaj mübadiləsinin davam etdiyini də vurğulayıb.
“İki ölkənin maraqlarını qoruyan nümayəndəliklər – Tehrandakı İsveçrə səfirliyi və Vaşinqtondakı Pakistan səfirliyi vasitəsilə diplomatik təmasların aparılması üçün hər zaman aydın və məlum bir format olub” - deyə, o bildirib.
Qeyd edək ki, Bəqai avqustun 4-də də ABŞ-la nüvə məsələsi üzrə birbaşa danışıqlar ehtimalını rədd etmişdi.
Xatırladaq ki, İranla ABŞ arasında Omanın vasitəçiliyi ilə beş mərhələli dolayı danışıqlar aparılmış, lakin nəticəsiz başa çatmışdı. Danışıqların dalana dirənməsinin əsas səbəbi kimi İsrailin İranın nüvə obyektlərinə qarşı hərbi əməliyyata başlaması və ABŞ qüvvələrinin bu obyektlərə zərbə endirməsi göstərilir.
Eyni zamanda, Böyük Britaniya, Almaniya və Fransadan ibarət “Avropa üçlüyü” də Tehranla paralel danışıqlar aparsa da, yeni nüvə razılaşmasının əldə olunmasına nail ola bilməyiblər.
