BAKI, AzerVoice

Türkiyənin Xarici İşlər Naziri Hakan Fidan, Rusiya Xarici İşlər Naziri Sergey Lavrovun dəvəti ilə 26–27 may tarixlərində Rusiyaya rəsmi səfər edəcək.

AzerVoice xəbər verir ki, bu barədə Türkiyənin Xaricin İşlər Nazirliyi məlumat yayıb.

Məlumata görə, səfər çərçivəsində Hakan Fidanın Rusiya Prezidenti Vladimir Putin tərəfindən qəbul olunması və həmkarı Sergey Lavrov ilə görüşməsi planlaşdırılır.

Fidanın, 16 may tarixində İstanbulda keçirilmiş Rusiya–Ukrayna danışıqlarında Rusiya heyətinə rəhbərlik etmiş Prezidentin köməkçisi Vladimir Medinski, Müdafiə naziri Andrey Belousov və digər yüksək vəzifəli Rusiya rəsmiləri ilə ikitərəfli görüşlər keçirməsi də nəzərdə tutulur.

Görüşlərdə Türkiyə və Rusiyanın ikitərəfli münasibətlərinin ətraflı şəkildə müzakirə olunması, ticarət, enerji və turizm kimi əsas əməkdaşlıq sahələrindəki vəziyyətin nəzərdən keçirilməsi və atıla biləcək addımların dəyərləndirilməsi gözlənilir.

Bundan əlavə, Fidanın 2022-ci ildə və mayın 16-da olduğu kimi, tərəflərin iştirak etdiyi danışıqlarda Türkiyənin vasitəçi rol oynamağa hazır olduğunu bir daha ifadə etməsi, həmçinin Suriya, Qəzza və Cənubi Qafqaz daxil olmaqla regional və beynəlxalq məsələlər üzrə fikir mübadiləsi aparması nəzərdə tutulur.