BAKI, AzerVoice
Türkiyə Nəqliyyat və İnfrastruktur naziri Uraloğlu, Türkiyə ilə Naxçıvan arasında dəmiryolu bağlantısı yaradacaq Qars-Iğdır-Aralık-Dilucu Dəmiryolu Layihəsi üçün Maliyyə Nazirliyinin apardığı işlərlə 2,4 milyard avro dəyərində xarici maliyyələşdirmə təmin edildiyini açıqlayıb.
AzerVoice xəbər verir ki, Abdulkadir Uraloğlu, Türkiyənin şərqini Asiyaya birləşdirəcək strateji əhəmiyyətə malik Kars-Iğdır-Aralık-Dilucu Dəmiryolu Layihəsi ilə bağlı açıqlama verib.
Türkiyə Maliyyə Nazirliyinin apardığı uğurlu işlər nəticəsində layihə üçün 2,4 milyard avro xarici maliyyə təmin edildiyini bildirən Uraloğlu, “Türkiyənin şərqini Asiyaya bağlayacaq strateji bir addım daha! Türkiyə ilə Naxçıvan arasında dəmiryolu bağlantısı yaradacaq Kars-Iğdır-Aralık-Dilucu Dəmiryolu Layihəsi üçün Maliyyə Nazirliyimizin apardığı işlərlə bu önəmli layihə üçün 2,4 milyard avro xarici maliyyələşdirmə təmin edildi.” ifadələrini istifadə edib.
Uraloğlu, təmin edilən maliyyənin Türkiyənin həyata keçirdiyi iqtisadi proqramlara beynəlxalq səviyyədə olan güvənin göstəricisi olduğunu vurğulayaraq, Nəqliyyat və İnfrastruktur Nazirliyi olaraq Türkiyənin loqistika gücünü artıracaq və beynəlxalq rəqabətdə üstünlük yaradacaq infrastruktur layihələrini qətiyyətlə həyata keçirməyə davam etdiklərini bildirib.