Bakı, AzerVoice
Azərbaycan Respublikasının Gənclər Fondunun dəstəyi, “Gənclərin Maarifləndirilməsinə Dəstək” İctimai Birliyinin və Azərbaycan Texniki Universiteti Tələbə Həmkarlar İtiifaqı Komitəsinin tərəfdaşlığı ilə 12-13 oktyabr tarixlərində “Veni Vidi Vici” layihəsi həyata keçirilib.
Bu barədə AzerVoice-a “Gənclərin Maarifləndirilməsinə Dəstək” İctimai Birliyindən (GMD) məlumat verilib.
3 mərhələdən ibarət olan layihə, gənclərin mübarizə ruhunu, zəka və fiziki gücünü sınamağa yönəlib.
Yarışın ilk mərhələsində keçirilən intellektual yarışda iştirakçılar öz biliklərini nümayiş etdirib, çevik düşünmə bacarıqlarını sübut ediblər. İkinci mərhələdə isə idman yarışında öz fiziki güc və bacarıqlarını göstəriblər. Hər iki mərhələni uğurla başa vuran 3 komanda final mərhələsində iştirak etmək haqqı qazanıb. Finalda komandalar "Axtar Tap" oyunu oynayıb, gizli tapşırıqları həll ediblər. Yarışın sonunda qalib komanda müxtəlif hədiyyələrlə mükafatlandırılıb.
Qeyd etmək lazımdır ki, layihə rəhbəri Elmira Kərimovanın olduğu, Azərbaycan Respublikasının Gənclər Fondu tərəfindən keçirilən “İdeyanı Reallaşdır” qrant müsabiqəsinin qalibi olan layihə gənclərin sosiallaşması, səmərəli vaxt keçirməsi məqsədilə həyata keçirilib. Tədbirin sonunda iştirakçılar yeni dostluqlar quraraq həm əylənib, həm də öyrəniblər.
Məlumat üçün bildirək ki, “Gənclərin Maarifləndirilməsinə Dəstək” İctimai Birliyi 30 avqust 2012-ci ildən Azərbaycan Respublikasının Ədliyyə Nazirliyində dövlət qeydiyyatına alınıb və yarandığı ilk gündən etibarən hər zaman gənclər siyasətinə dəstək olaraq, bu sahədə atılan addımlarda ön sıralarda yer alıb.
Birlik gənclərin vətənpərvərlik hisslərinin, dövlətçilik dəyərlərinin yüksəldilməsi, gənclərin asudə vaxtlarının səmərəli və öyrədici formada dəyərləndirilməsi məqsədilə gənclər sektorunda mühüm rol oynayan müxtəlif istiqamətlər üzrə çoxsaylı layihələr həyata keçirir
Qeyd etmək lazımdır ki, Türkdilli dövlətlərin ilk ortaq media platforması olan "Türk Dünyası" (Turkic.World) və “Gənclərin Maarifləndirilməsinə Dəstək” İctimai Birliyi tərəfdaşlıq memorandumu imzalayıb.
Memorandum Trend Beynəlxalq İnformasiya Agentliyinin (BİA) direktor müavini Rufiz Hafizoğlu və “Gənclərin Maarifləndirilməsinə Dəstək” İctimai Birliyinin sədri Aynurə Salmanlı arasında imzalanıb.
Memoranduma əsasən, "Turkic.World" media layihəsi “Gənclərin Maarifləndirilməsinə Dəstək” İctimai Birliyinin rəsmi media tərəfdaşı olub.
Media platformanın fəaliyyəti haqqında məlumat verən Hafizoğlu bildirib ki, "Türk Dünyası" (Turkic.World) media platforması “GMD” ilə əməkdaşlığı yüksək qiymətləndirir və bundan sonra da müxtəlif sahələrdə əməkdaşlığa hazırdır.
