Bakı. AzerVoice:
Azərbaycan Respublikasının Türkmənistandakı Səfirliyinin təşkilatçılığı ilə Aşqabadın ən prestijli məkanlarından sayılan “Mandarin” restoranında “Azərbaycan mətbəxi və mədəniyyəti” adlı tədbir keçirilib.
AzerVoice xəbər verir ki, tədbirdə Türkmənistanda akkreditə olunmuş bir sıra xarici diplomatik missiyaların rəhbərləri və nümayəndələri, eləcə də ictimaiyyət təmsilçiləri və Türkmənistanda yaşayan azərbaycanlılar iştirak edib.
Milli mətbəximizin ləziz yemək və şirniyyatları təqdim olunub, Azərbaycan milli musiqi nümunələri səsləndirilib və rəqs nömrələri göstərilib. Həmçinin ölkəmizi tərənnüm edən video-sujetlər nümayiş olunub.
Eyni zamanda tədbirdə ölkəmizin tarixi, mədəniyyəti, incəsənətini səciyyələndirən suvenirlər və Azərbaycan məhsulları nümayiş etdirilib. Tədbirdə Azərbaycanla bağlı müsabiqə keçirilib və qaliblərə ölkəmizlə bağlı hədiyyələr təqdim olunub.
