BAKI, AzerVoice, Nailə Babazadə
Vyanada daimi nümayəndəlikləri olan İran, Çin və Rusiya, Beynəlxalq Atom Enerjisi Agentliyinin (MAQATE) Baş Direktoru ilə Agentliyin yaxınlaşan İdarə Heyəti iclası öncəsi görüş keçiriblər.
AzerVoice xəbər verir ki, görüş barədə məlumatı çərşənbə axşamı günü Vyanada beynəlxalq təşkilatlar üzrə Rusiya daimi nümayəndəsi Mixail Ulyanov açıqlayıb.
“Çin, İran və Rusiya daimi nümayəndələri bu gün MAQATE-nin Baş Direktoru Rafael Grossi və onun komandası ilə görüşərək yaxınlaşan İdarə Heyəti iclası ilə bağlı fikir mübadiləsi aparıblar,” – deyə Ulyanov X sosial şəbəkəsində qeyd edib.
O, digər bir paylaşımında Rusiya, Çin və İrana “İranın nüvə proqramında əsas oyunçular” adını verib və əlavə edib ki, “bu ölkələr vəziyyətin necə inkişaf edəcəyinə əhəmiyyətli dərəcədə qərar verirlər.”
Üç ölkənin səfirləri həmçinin İdarə Heyəti iclası öncəsi mövqelərini əlaqələndirmək üçün keçən həftə üçtərəfli görüş keçiriblər.
İdarə Heyəti iclası 19–21 noyabr tarixlərində baş tutacaq və İranın nüvə məsələsi yalnız Qarantiyalar Sazişi çərçivəsində müzakirə olunacaq.
İran bildirib ki, Qarantiyalar Sazişinə sadiq qalır və bu il Parlament tərəfindən qəbul edilmiş qanunlara uyğun olaraq MAQATE ilə əməkdaşlığı davam etdirəcək.
Həmin qanun İranın MAQATE ilə daha geniş əməkdaşlığını, o cümlədən nüvə obyektlərinin ətraflı yoxlanışlarını müvəqqəti dayandırır. Bu dayandırma, MAQATE-in ABŞ və İsrailin İran nüvə obyektlərinə iyun ayında etdiyi hava zərbələrini qınamağı rədd etməsindən sonra həyata keçirilib.
İran bəyan edir ki, onun nüvə proqramı sülh məqsədilədir və MAQATE-dən qərarlarını Qərb təzyiqi altında siyasi mövqelərə əsaslandırmamağı tələb edir.