BAKI, AzerVoice

ABŞ-ın nəhəng avtomobil istehsalçısı Ford Motor Company, əyləc sistemində təhlükə yarada biləcək nasazlıq səbəbilə ümumilikdə 273.789 ədəd Expedition və Lincoln Navigator markalı SUV modelini geri çağırdığını açıqlayıb.

AzerVoice xəbər verir ki, şirkət bu qərarı, 2022–2024-cü illər arasında istehsal olunmuş avtomobillərlə bağlı 45 zəmanət hesabatı aldıqdan sonra verib.

ABŞ-ın Nəqliyyat Təhlükəsizliyi Administrasiyası (NHTSA) tərəfindən yayımlanan sənədlərə əsasən, ön əyləc borularında istehsal və ya montaj zamanı baş verən səhv nəticəsində bu borular mühərrikin hava filtri çıxış borusuna toxuna bilər. Bu isə əyləc mayesinin sızmasına və nəticə etibarilə əyləc funksiyasının itirilməsinə səbəb ola bilər.

Geri çağırılan modellər:

• 223.315 ədəd Ford Expedition
• 50.474 ədəd Lincoln Navigator

Hazırda problemi olan modellərin cəmi 1%-də bu nasazlığın müşahidə olunacağı ehtimal edilir.

Ford şirkətinin açıqlamasına görə, indiyədək bu nasazlıqla bağlı hər hansı qəza və ya xəsarət hadisəsi baş verməyib. Lakin şirkət təhlükəsizlik məqsədilə problemin dərhal aradan qaldırılması üçün tədbirlər görür.

Ford və Lincoln markalarının dilerləri, sözügedən modellərin ön əyləc sistemini yoxlayacaq, lazım gəldikdə əyləc borusu və ya hava filtri çıxış borusunu pulsuz şəkildə dəyişdirəcəklər.