Bakı, AzerVoice

Birləşmiş Ştatlar, dünən (çərşənbə günü) nüvə silahına malik Pakistanın uzaqmənzilli ballistik raket proqramına, o cümlədən bu proqrama nəzarət edən dövlət qurumuna qarşı yeni sanksiyalar tətbiq etdiyini açıqlayıb.

AzerVoice xəbər verir ki, ABŞ Dövlət Departamentinin sözçüsü Metyu Millerin verdiyi açıqlamaya görə, Milli İnkişaf Kompleksi (NDC) və üç şirkətə qarşı tətbiq edilən sanksiyalar “kütləvi qırğın silahları istehsalçılarını və onların yayılması vasitələrini” hədəf alan icra sərəncamı çərçivəsindədir.

Bu sanksiyalar, hədəf təşkilatlara məxsus ABŞ əmlakını dondurur və amerikalıların həmin təşkilatlarla iş aparmasına mane olur.

Pakistan Xarici İşlər Nazirliyi, ABŞ-ın bu hərəkətini "qərəzli" olaraq qiymətləndirib.

Nazirlik, Pakistanın Hindistanla olan nüvə silahı sahəsindəki rəqabətinə açıq şəkildə istinad edərək, bu addımın regional sabitliyə zərər verəcəyini bildirib. ABŞ Dövlət Departamentinin məlumatına görə, İslamabadda yerləşən MDM (Milli Müdafiə Nazirliyi) uzun mənzilli ballistik raket proqramı üçün komponentlər və raket sınaq avadanlığı axtarır. Məlumatda qeyd olunub ki, MDM Pakistanın ballistik raketlərinin, o cümlədən Şahin raketinin hazırlanmasına cavabdehdir.

Qeyd edək ki, Pakistan 1998-ci ildə ilk nüvə silahı sınağını keçirərək, bu sahədə yeddinci ölkə olub. "Bülleten of Atomic Scientists" hesab edir ki, Pakistanın arsenalında təxminən 170 döyüş başlığı var. Lakin İslamabad, nüvə silahlarının yayılmasının qarşısını almaq məqsədini güdən Nüvə Silahlarının Yayılmaması Müqaviləsini imzalamaqdan imtina edib.

ABŞ Dövlət Departamentinin məlumatına əsasən, sanksiya tətbiq edilən digər təşkilatlar arasında Affiliates International, Akhtar & Sons Private Limited və baş ofisi Karaçidə yerləşən Rockside Enterprises var. Bu şirkətlər avadanlıq alışı üçün MDM ilə əməkdaşlıq ediblər. Metyu Miller, "Birləşmiş Ştatlar silahların yayılmasına və satınalma fəaliyyətlərinə qarşı mübarizəyə davam edəcək" deyib.