Bakı,AzerVoice

Quraqlıqdan əziyyət çəkən İraqın bir vaxtlar qüdrətli çayları Dəclə və Fərat kanalizasiyadan tibbi tullantılara qədər çirkləndirilir ki, bu da  öz növbəsində ölkədə ciddi su  böhranı yarada bilər.

AzerVoice xəbər verir ki,  İraq Su Ehtiyatları Nazirliyinin sözçüsü Xalid Şamal yerli mediaya açıqlamasında ölkənin yaxın 20 il ərzində içməli su böhranı ilə üz-üzə qalacağını bildirib.

"İraqda suyun çirklənməsi ilə bağlı qəribə olan odur ki, əksər dövlət qurumları buna görə məsuliyyət daşıyırlar. Çay yaxınlığındakı xəstəxanaların əksəriyyəti tibbi tullantıları və kanalizasiya sularını birbaşa çaya atırlar. Bu  çox ciddi təhlükədir və İraq xalqının gələcəyini məhv edir”- deyə o bildirib.

Qeyd edək ki, Birləşmiş Millətlər Təşkilatı bildirir ki, yay istisinə və müntəzəm qum fırtınaları olan İraq iqlim dəyişikliyinin bəzi təsirlərindən ən çox təsirlənən beş ölkədən biridir.

43 milyon əhalisi olan ölkə dörd il dalbadal quraqlıqdan əziyyət çəkir və su qıtlığı həddindən artıq həddə çatıb.

Səlahiyyətlilərə görə, İraqın qonşuları olan İran və Türkiyə tərəfindən tikilən yuxarı axın bəndləri, İraqıda Dəclə və Fəratda suyun səviyyəsini aşağı salıb.