BAKI, AzerVoice, Orxan Qədirzadə
Fələstinli siyasi lider Mərvan Bərqutinin azadlığa buraxılması tələbi ilə yeni beynəlxalq kampaniya başladılıb. Aksiya Bərqutinin ailəsi, eləcə də Böyük Britaniyada fəaliyyət göstərən bir sıra hüquq müdafiəçiləri tərəfindən təşkil olunub və məqsəd 66 yaşlı siyasətçinin azad edilməsini İsraillə HƏMAS arasında növbəti mərhələ üzrə atəşkəs razılaşmasının əsas şərtlərindən birinə çevirməkdir.
AzerVoice xəbər verir ki. kampaniya çərçivəsində Londonun müxtəlif küçələrində “Free Marwan” (“Mərvanı azad edin”) şüarı ilə divar rəsmləri nümayiş olunub. Təşəbbüs yaradıcı platforma olan Creative Debuts şirkətinin rəhbəri Kalum Hall tərəfindən koordinasiya edilir. Eyni zamanda, işğal altındakı İordan çayının qərb sahilində yerləşən Kobar kəndində Mərvan Bərqutiyə həsr olunmuş iri həcmli sənət instalyasiyası təqdim edilib.
Fətəh hərəkatının üzvü olan Bərquti, müstəqil sorğularda uzun müddətdir Fələstinin ən populyar siyasətçilərindən biri kimi göstərilir və gələcək fələstin dövlətinin potensial lideri kimi qiymətləndirilir. O, 2004-cü ildən İsraildə həbsdə saxlanılır və ikinci intifada dövründəki fəaliyyəti ilə əlaqədar beş ömürlük həbs və əlavə 40 il cəza alıb.
Ailəsinin məlumatına görə, Bərquti uzun müddət təkadamlıq kamerada saxlanılıb, üç ildir ailə üzvləri ilə görüşünə icazə verilməyib və 2023-cü ildən bəri dörd ağır fiziki hücuma məruz qalıb. O, həmçinin Beynəlxalq Qızıl Xaç Komitəsi ilə görüşmək hüququndan məhrum edilib. Bu ilin əvvəlində İsrailin milli təhlükəsizlik naziri İtamar Ben-Qvirin həbsxanada Bərqutini təhqir etməsi və edamla hədələməsi ilə bağlı görüntülər yayılıb.
Ben-Qvir milli motivli qətllərlə əlaqədar məhkumlar üçün ölüm cəzasının leqallaşdırılmasını dəstəkləyir. Mərvan Bərqutinin azad edilməsi üçün hazırlanan və siyasətçilər, mədəniyyət xadimləri tərəfindən imzalanan müraciət məktubu gələn həftə ictimaiyyətə təqdim ediləcək.
İsrail hökuməti təzyiqlərə baxmayaraq Bərqutinin azad edilməsinə hələ də müqavimət göstərir. HƏMAS, Körfəz ölkələri və hətta ABŞ Prezidenti Donald Trampın məsələyə müdaxilə edə biləcəyinə dair bəzi siqnallar bu çağırışların güclənməsinə səbəb olub.
Son aylarda Bərqutinin ailə üzvləri İsrail mediasına müsahibələr verərək cəmiyyətin mövqeyini dəyişdirməyə çalışdıqlarını bildiriblər. Onun həyat yoldaşı Fədva Bərquti deyib ki, Mərvan “iki dövlətli həllin sülh üçün yeganə yol olduğuna” inanır. Oğlu Ərəb Bərquti isə “Dünyada insanların atamın adını qaldırması bizə ümid verir. Bu, yalnız onun azadlığı üçün deyil, bütün fələstinli məhbusların azadlığı üçün çağırışdır.”- deyə bildirib.