Bakı, AzerVoice

Azərbaycan ardıcıl ikinci ay Türkiyəyə qaz tədarüklərinin həcminə görə lider olub.

AzerVoice bu barədə Türkiyə Enerji Bazarlarının Tənzimlənməsi İdarəsinin (EPDK) dərc etdiyi məlumatlara istinadən xəbər verir.

Belə ki, ölkə 2024-cü ilin may ayında Türkiyəyə təbii qaz ixracını artıraraq, keçən ilin analoji dövrü ilə müqayisədə 9,24 faiz artım əldə edib.

İxrac 2023-cü ilin mayında 923,23 milyon kubmetrdən təxminən 1,009 milyard kubmetrə çatıb.

Beləliklə, Azərbaycan hesabat dövründə Türkiyəyə ən çox təbii qaz ixrac edən ölkə olub.

İkinci yerdə Rusiya qərarlaşıb. Belə ki, ölkə 734,41 milyon kubmetr təbii qaz ixrac edib ki, bu da 2023-cü ilin may ayı ilə müqayisədə 28,26 faiz azalma deməkdir.

İran 593,49 milyon kubmetr təbii qaz ixracı ilə üçüncü yerdə qərarlaşıb ki, bu da 2023-cü ilin may ayı ilə müqayisədə (885,01 milyon kubmetr) 32,94 faiz azalma deməkdir.

Bütünlükdə Türkiyə qaz idxalını 2023-cü ilin may ayındakı 3,692 milyard kubmetrlə müqayisədə 21,94 faiz azaltmaqla 2024-cü ilin mayında təxminən 2,882 milyard kubmetrə salıb.

Boru kəməri qazının idxalı 17,49 faiz azalaraq 2 milyard 336 milyon kubmetr, maye təbii qaz (MTQ) idxalı isə 36,56 faiz azalaraq 545,86 milyon kubmetr olub.